Көру қабілетінің бұзылыстары бар балаларды оқыту мен әлеуметтендірудегі тифлопедагог жұмысының заманауи технологиялары мен әдістері» педагог кадрлардың біліктілігін арттыру курстарының білім беру бағдарламасы

1. Жалпы ережелер

1. «Көру қабілетінің бұзылыстары бар балаларды оқыту мен әлеуметтендірудегі тифлопедагог жұмысының заманауи технологиялары мен әдістері» біліктілікті арттыру курстарының білім беру бағдарламасы (бұдан әрі – Бағдарлама) көру қабілетінің бұзылыстары бар балаларға арналған арнайы (түзету) мектептерде жұмыс істейтін педагогтарды оқытуды регламенттейді.

1.2. Қазақстан Республикасының заңнамасы білім беру саласындағы халықаралық стандарттарға сәйкес барлық балалардың психофизиологиялық және жеке ерекшеліктерін ескере отырып, сапалы білім алуға тең құқықтарына кепілдік береді. Ерекше білім беру қажеттіліктері бар балаларға, оның ішінде көру қабілетінің бұзылыстары бар білім алушыларға ерекше көңіл бөлінеді.

1.3. Тифлопедагогика ғылыми пән ретінде көру қабілетінің бұзылыстары бар балалардағы сенсорлық тапшылықты өтеуге бағытталған оқытудың инновациялық әдістері мен технологияларын енгізу бағытында дамуда. Негізгі міндет – мұндай балаларды әлеуметтендірудің тиімді тәсілдерін қалыптастыру, оған оларды академиялық оқыту, дербестілік пен бағдарлау дағдыларын дамыту, сондай-ақ қоғамға сәтті интеграциялауға дайындық кіреді.

1.4. Көру қабілетінің бұзылыстары бар балаларды оқытудағы заманауи технологиялар бейімделген білім беру әдістерін, цифрлық құралдарды және мамандандырылған техникалық құралдарды пайдалануды қамтиды. Бұл ақпаратты қабылдауды жақсартуға, оқу материалының қолжетімділік деңгейін арттыруға және балалардың танымдық, коммуникативтік және әлеуметтік дағдыларын дамытуға мүмкіндік береді.

1.5. Біліктілікті арттыру курстарын өткізудің өзектілігі мен қажеттілігі арнайы мектептер мен сыныптарда жұмыс істейтін тифлопедагогтардың кәсіби құзыреттілігіне қойылатын талаптардың өсуіне байланысты. Заманауи білім беру технологияларын енгізу, түзету жұмыстарының әдістерін дамыту және көру қабілетінің бұзылыстары бар балаларды әлеуметтендіру тәсілдерін жетілдіру педагогтардың үнемі кәсіби дамуын талап етеді.

1.6. Бағдарлама түзету педагогикасы саласындағы заманауи үрдістерді, сондай-ақ арнайы мектептердің білім беру қызметін талдау барысында анықталған педагогтардың практикалық қажеттіліктерін ескере отырып әзірленді. Курстар көру қабілетінің бұзылыстары бар балаларды оқыту, әлеуметтендіру және сүйемелдеу әдістемесі саласындағы педагог қызметкерлердің біліктілігін арттыруға бағытталған.