«Арнайы және инклюзивті білім беруді дамытудың Ұлттық ғылыми-практикалық орталығы» РММ (АИБД ҰҒПО) ҚР Министрлер Кабинетінің 1992 жылғы 31 наурыздағы №305 қаулысы және ҚР Білім Министрлігінің 30.04.1992 ж. «Ақыл-ой және дене дамуында ақаулары бар балалар мен жасөспірімдерді әлеуметтік бейімдеу және кәсіби-еңбекпен оңалтудың Республикалық орталығын құру туралы» №200 бұйрығы негізінде құрылды. Орталықтың ұйымдастырушысы және бірінші басшысы педагогика ғылымдарының докторы, профессор Сүлейменова Роза Айтжанқызы болды.

Арнайы білім беру саласындағы ғылыми-қолданбалы зерттеулер жүзеге асырылатын және сонымен бірге диагностика, оқыту және тәрбие мәселелері бойынша дамуында түрлі бұзылыстары бар балаларға көмек көрсете алатын АИБД ҰҒПО-ны түбегейлі жаңа үлгіде құру идеясы сол уақыттың талабы болды. Тарихи тұрғыдан алғанда, Қазақстанда арнайы білім беру мәселелерімен айналысатын ғылыми-зерттеу зертханасы, институт болмаған. Осының бәрі Р.А. Сүлейменованы Республикада арнайы білім беруді әдістемелік, құқықтық және ақпараттық қамтамасыз ету мәселелерімен айналысатын Орталық құруға итермеледі.

Р.А. Сүлейменованың басшылығымен ерте жастан түзету-педагогикалық көмек жүйесін модельдеу жүргізілді. Жаңа қызметтердің (лекотекалардың) модельдері ұйымдастырылып, әзірленді және енгізілді, олар алдағы уақытта жаңа арнайы білім беру ұйымдарының өздігінен жұмыс істейтін қызметтер ретінде жүргізіле бастады. Бұл – психологиялық-медициналық-педагогикалық консультациялар (ПМПК), Оңалту орталықтары (ОО), психологиялық-педагогикалық түзету кабинеттері (ППТК). Ұйымдардың осы жаңа түрлерінің барлығы Р.А. Сүлейменованың бастамасымен және басшылығымен әзірленіп, 2002 жылы қабылданған «Мүмкіндігі шектеулі балаларды әлеуметтік және медициналық-педагогикалық түзеу арқылы қолдау туралы» заңға енді.

ҚР Білім және ғылым министрлігінің 2000 жылғы 6 мамырдағы №439 бұйрығымен орталық «Даму бұзылыстары бар балалар мен жасөспірімдерге арналған әлеуметтік бейімдеу және кәсіптік-еңбекпен оңалтудың Республикалық ғылыми-практикалық орталығы» болып өзгертілді. Мекеме Ұлттық орталық мәртебесін Қазақстан Республикасы Үкіметінің 2004 жылғы 25 ақпандағы №222 Қаулысына сәйкес алды.

ҚР Үкіметінің 23.06.2020 жылғы № 384 Қаулысына сәйкес Орталық «Арнайы және инклюзивті білім беруді дамытудың Ұлттық ғылыми-практикалық орталығы» Республикалық мемлекеттік мекемесі болып өзгертілді.

«АИБД ҰҒПО» РММ орналасқан жері – Алматы қ., Байзақов к-сі, 273 А.