Балалар мен олардың отбасыларына ерте көмек көрсету бойынша қызмет көрсететін мамандар үшін «Ерте жастағы балалар мен олардың отбасыларына ерте қолдау көрсету» педагог кадрлардың біліктілігін арттыру курстарының білім беру бағдарламасы

1. Жалпы ережелер

1. «Ерте жастағы балалар мен олардың отбасыларына ерте қолдау көрсету» педагогтардың біліктілігін арттыру курстарының білім беру бағдарламасы (бұдан әрі – Бағдарлама) балаларға және олардың отбасыларына ерте көмек көрсету бойынша қызмет көрсететін мамандарды (арнайы педагогтарды, педагог-психологтарды, логопед-мұғалімдерді, ЕДШ нұсқаушыларын, әдіскерлерді), психологиялық-педагогикалық түзету кабинеттерін (бұдан әрі – ППТК) және оңалту орталықтарын (бұдан әрі – ОО) оқытуды регламенттейді.

2. ППТК және ОО мамандары үшін ерте жастағы балалар мен олардың отбасыларын ерте қолдау бойынша біліктілікті арттыру курстарын өткізудің өзектілігі баланы ерте анықтау және оның дамуына араласу қажеттілігіне байланысты. Халықаралық қоғамдастықта мүмкіндігі шектеулі балаларды мемлекеттік қолдау неғұрлым ізгілікті және үнемді, ресурс үнемдейтін педагогикалық технология ретінде ерте қолдауға бағытталған. Ерте және мектепке дейінгі жаста қажетті көмекті уақтылы көрсету баланың дамуындағы бұзылыстарды едәуір жеңуге және оны жалпы білім беретін мектепте оқуға дайындауға мүмкіндік береді.

Қазақстан Республикасында «Мүмкіндігі шектеулі балаларды әлеуметтік және медициналық-педагогикалық қолдау туралы» Заңға (2002ж.) және Мүмкіндігі шектеулі балаларды арнайы психологиялық-педагогикалық қолдау стандартына (Оқу-ағарту министрлігінің 2025 жылғы 21 мамырдағы № 117 бұйрығы) сәйкес мүмкіндігі шектеулі балаларға жалпы білім беретін мектепке дейінгі ұйымдарда, психологиялық-педагогикалық түзету кабинеттерінде және оңалту орталықтарында арнайы психологиялық-педагогикалық қолдау көрсетіледі.